Dagsturhytta

Dagsturhytta “Tveitaslottet” vart opna vinteren 2022. Fitjar folkebibliotek har ansvar for turbiblioteket i hytta.

Gåve frå Vestland fylke

I samband med samanslåinga Hordaland og Sogn og fjordane til det nye fylket Vestland vart det sendt ut tilbod til alle kommunane om å få ei dagsturhytte kvar til ein svært rimeleg pris som ein «bryllaupspresang» til bruk for ålmenta. Hyttene har ein verdi på om lag 1 mill. kr. og eigendelen til kommunane er om lag kr. 160 000,- noko av dette kan også være i form av dugnad.

Tur for barnefamiliar

I juni 2020 vedtok kommunestyret at ein skulle takke ja til ei slik hytte. Vidare vart det i kommunestyret i desember 2020 vedteke at hytta skal plasserast i Tveitekleiva. På denne staden er det nydeleg utsikt utover Fitjarøyane. Staden er og eit fantastisk utgangspunkt for lengre turar innover i fjellet.
Turen tar om lag 25 minuttar for ein barnefamilie oppover traktorvegen frå parkeringsplassen på Dalshaugane.

Nynorsk turbibliotek

Dagsturhytta har eit nynorsk turbibliotek med freistande bøker som kan brukast på hytta. Lesing er eit helsefremjande tiltak, og etablering av nynorske turbibliotek i dagsturhyttene styrkar folkehelseperspektivet i prosjektet. Bøkene skal stimulere til lesing og gjere nynorsk barnelitteratur kjent og tilgjengeleg for fleire. Det er Fitjar folkebibliotek som har ansvar for turbiblioteket i Fitjar si hytte, som forsyner hytta med bøker og held samlinga ved like.